Followers

വിഷം തീണ്ടുന്നവര്‍

The Soul  of  India lives in it 's villege 
                                                    Gandhiji 









തലയണ മന്ത്രം എന്ന സിനിമയിലെ ശ്രീനിവാസനും, ഉര്‍വശിയുംആധുനിക മലയാളിയുടെ പ്രതിനിധികളാണ്. ഉപഭോഗസംസ്ക്കാരം ഒരു ഭ്രാന്ത് ആകുമ്പോഴാണ് അവര്‍ ഫ്രിഡ്ജും ,വാഷിംഗ് മെഷീനും ഒക്കെ കടം വാങ്ങി ക്കൂട്ടുന്നത്. അനാവശ്യമായ ബാധ്യത വലിച്ചു വച്ചിട്ടു , ഒടുവില്‍ അഭിമാനം വരെ ചോദ്യം ചെയ്യപ്പെടുന്നു  സിനിമയില്‍. യഥാര്‍ത്ഥ ജീവിതത്തില്‍ അത്തരം സന്ദര്‍ഭങ്ങളെ  ആത്മഹത്യ കൊണ്ടാണ് പരിഹരിക്കപ്പെടുന്നത്.

ഒറ്റ മുറിയുള്ള ഒരു ഓലപ്പുരയിലാണ് ഞാന്‍ ഏറെക്കാലം ജീവിച്ചത്.ഒരു വീടുണ്ടാക്കാന്‍ അന്ന്  തുച്ഛമായ പണമേ ചിലവാക്കേണ്ടി വന്നുള്ളൂ. എന്റെ ഇത്തിരി മണ്ണില്‍ നിന്ന് തന്നെ കട്ടകള്‍ ഉണ്ടാക്കി .ചുട്ടു വട്ടങ്ങളില്‍ നിന്ന് കാട്ടു കല്ലുകള്‍ ശേഖരിച്ചു. പനയോല അയല്‍ക്കാര്‍ തന്നു. എനിക്ക് ഇഷ്ടപ്പെട്ട രീതിയില്‍ ഞാന്‍ ഒരു കൊച്ചു വീട് നിര്‍മ്മിച്ചു. സ്വച്ഛന്തമായ ഒരു ജീവിതം ആയിരുന്നു അത്. പതിനായിരങ്ങളുടെ കണക്കുകളെ ക്കുറിച്ച് ഞാന്‍ ഒരിക്കലും   ബേജാര്‍ ആയില്ല.

ഒരു റേഡിയോ ഉണ്ടായിരുന്നു എന്റെ വിരസ വേളകളില്‍ കൂട്ടായി.. ആ ലളിതമായ ജീവിതത്തില്‍ ഞാന്‍ വളരെ സന്തുഷ്ടന്‍ ആയിരുന്നു. എന്റെ മേശയ്ക്കരികില്‍ ഞാന്‍ ഒരു കിളി വാതില്‍ ഉണ്ടാക്കിയിരുന്നു. ചിലപ്പോള്‍ അസൌകര്യം എന്ന് തോന്നുമ്പോള്‍  അതിന്റെ രൂപവും ഭംഗിയും മാറി മാറി പരീക്ഷിച്ചിരുന്നു. അതിനുവേണ്ടി എനിക്ക് മാര്‍ക്കറ്റില്‍ നിന്ന് ഒന്നും പണം കൊടുത്തു വാങ്ങേണ്ട ആവശ്യം വന്നില്ല. എനിക്കെന്നല്ല  അതുപോലുള്ളയുള്ള കാര്യങ്ങള്‍ ആര് ചെയ്താലും ,ഇന്നും പണം, മുടക്ക്  വേണ്ടി വരികയില്ല. സുഹൃത്തുക്കളും വിരുന്നുകാരും വരുന്ന സന്ദര്‍ഭത്തില്‍ ആട്ടിന്‍പാല്‍ കറന്നെടുത്തു ഞാന്‍ അവര്‍ക്ക് ചായ കൊടുത്തു സല്ക്കരിക്കുമായിരുന്നു. അതിനു എനിക്ക് വരുന്ന ശ്രമം , ഒരു ആടിനെ വളര്‍ത്തുക എന്നത് മാത്രമായിരുന്നു. കാലം കുറെ കഴിഞ്ഞു , ഇത്തിരി കൂടി സൌകര്യങ്ങളോടെ ഒരു വീട്  ആവശ്യമായി വന്നു. ബാങ്കില്‍ നിന്ന് കടമെടുത്ത് വീട് വച്ചു.  വര്‍ഷങ്ങള്‍ എടുത്തു ആ ബാധ്യതയില്‍ നിന്ന്  മോചനം കിട്ടാന്‍. ഒരു ചെറിയ തുകക്ക് പകരമായി ഞാന്‍ ഭീമമായ ഒരു തുക ബാങ്കില്‍ കൊടുത്തു. ഒപ്പം അത്രയും കാലം ഞാന്‍ അനുഭവിച്ച മാനസിക വ്യഥ  എവിടെയും രേഖപ്പെടുത്തിയതുമില്ല.

 
നമ്മള്‍ ഉപഭോഗ സംസ്ക്കാരത്തില്‍ വീണു പോയി. മീഡിയകള്‍ അതില്‍ മുഖ്യ പങ്കു വഹിച്ചിട്ടുണ്ട്‌. പക്ഷെ ,കുറ്റക്കാര്‍ നമ്മളാണ്. സച്ചിന്‍  പല്ലുതേക്കുന്ന ടൂത്ത് പേസ്റ്റ് തന്നെ എനിക്കും വേണം എന്ന് പറയിച്ചത് മീഡിയ ആണ്.  സച്ചിന്‍ ചിലപ്പോള്‍ ഉമിക്കരിയാണ് ഉപയോഗിക്കുന്നത് എന്ന് ചിന്തിക്കാനുള്ള ബുദ്ധി അതിനു മുമ്പേ നമ്മള്‍ പരസ്യ കമ്പനിയ്ക്ക് പണയം വച്ചു കഴിഞ്ഞു. പാലിന്റെ കൊഴുപ്പ്  കാണിക്കാന്‍ വേണ്ടി പരസ്യക്കമ്പനിക്കാര്‍ പെയിന്റു ഒഴിച്ച് കാണിച്ചു. കാണികള്‍ അമ്പരന്നു പോയി. അന്ന് മുതല്‍  ആ കമ്പനിയുടെ പാല്‍ നമ്മളും ഉപയോഗിച്ച് തുടങ്ങി. എന്ത് കൊണ്ട് ആ നേരത്ത് നമുക്കൊരു ആടിനെ വളര്ത്തിക്കൂടാ എന്ന് തോന്നിയില്ല. കാലാ കാലമായി നമ്മുടെ മോഹങ്ങള്‍ നാം പുതുക്കി എടുക്കാറുണ്ട്. നമ്മുടെ ആഡം ഭര ഭ്രമത്തിന് വഴി തുറന്നു കൊണ്ട് വിപണികള്‍ ,നമ്മെ പ്രോത്സാഹിപ്പിച്ചു കൊണ്ടിരിക്കുന്നു. വീട് എല്ലാവരുടെയും സ്വപ്നമാണ്. അതിനു വേണ്ടി കോടികള്‍ മുടക്കാതെ , ഒന്ന് ശ്രമിച്ചു കൂടെ. വിപണിയില്‍ നിരത്തി വച്ചിരിക്കുന്ന ഗൃഹോപകരണങ്ങള്‍ ഒന്നും തന്നെ നമുക്ക് ആവശ്യമുള്ളതല്ല.

ഫ്രിഡ്ജും , വാഷിംഗ് മെഷീനും അതുപോലെയുള്ള ആധുനിക ഉപകരണങ്ങള്‍ ഒന്നും ഇല്ലെങ്കിലും സുഖമായി ജീവിക്കാന്‍ സാധിക്കും.ഒരിക്കല്‍ നമ്മെ കൊള്ളയടിച്ച വിദേശ ശക്തികള്‍ ഇന്ന് വിപണിയുടെ കുപ്പായം ധരിച്ചു കൊണ്ട് നമ്മെ സമീപിച്ചിരിക്കയാണ്. അന്ന്, ഗാന്ധിജി നമ്മെ രക്ഷിച്ചത്‌  വിദേശ വസ്ത്ര ബഹിഷ്ക്കരണത്തിലൂടെയാണ്. അദ്ദേഹം ഒരു കാര്യം കൂടി പഠിപ്പിച്ചു . ഭാരതത്തിന്റെ ആത്മാവ് ഗ്രാമങ്ങളില്‍ ആണ്. ലളിതമായ ജീവിതമാണ് അദ്ദേഹം സ്വപ്നം കണ്ടത്.
ഉപഭോഗ സംസ്ക്കാരം മണ്ണിനോടുള്ള നമ്മുടെ ബന്ധം ഇല്ലാതാക്കും.ഗാന്ധി ദര്‍ശങ്ങളില്‍ അടിയുറച്ച ഒരു ജീവിത ശൈലി കൊണ്ടേ  ജീവിതത്തെ കൂടുതല്‍ സുതാര്യമാക്കാന്‍ സാധിക്കൂ.



                                                                                                                                                                       




3 thoughts on “വിഷം തീണ്ടുന്നവര്‍”

  1. >>ആധുനിക ഉപകരണങ്ങള്‍ ഒന്നും ഇല്ലെങ്കിലും സുഖമായി ജീവിക്കാന്‍ സാധിക്കും<<
    എന്ന് പറയാന്‍ പറ്റില്ല ഇത് എന്റെ അഭിപ്രായം ആണ് ഒരു ദിവസം ഗ്യാസ് തീര്‍ന്നപ്പോള്‍ പെട്ട പാടോര്‍ത്ത് പറഞ്ഞു പോയതാണ് ..!

Leave a Reply